ഹയര് സെക്കന്ഡറി, ഹൈസ്കൂള്, പ്രൈമറി അധ്യാപകരുടെ ശമ്പള പരിഷ്കരണത്തില് സംഭവിച്ച അപാകത പരിഹരിച്ചു ധനമന്ത്രി കെ.എം. മാണി ഉത്തരവിട്ടതായി ഇന്നത്തെ (3-4-2013) മനോരമ ദിനപ്പത്രം റിപ്പോര്ട്ട് ചെയ്തു. വാര്ത്ത ഇങ്ങനെ. ഹയര്സെക്കന്ഡറി അധ്യാപകരുടെ ശമ്പള സ്കെയിലിലെ അപാകത പരിഹരിച്ചതിനു പുറമെ ഹൈസ്കൂള് ഹെഡ്മാസ്റ്റര് (ഹയര്ഗ്രേഡ്) ശമ്പള സ്കെയിലും വര്ധിപ്പിക്കും. നിലവില് 21240-37040 ആയിരുന്നത് 22360-37940 ആകും. ഹൈസ്കൂള് അധ്യാപകരുടെ(ബിരുദ-ഭാഷാ) ശമ്പള സ്കെയില് 14620-25280 എന്നതില്നിന്ന് 15380-25900 ആയി ഉയര്ത്തും. പ്രൈമറി, പ്രീപ്രൈമറി, നഴ്സറി വിഭാഗത്തില്പ്പെടുന്ന അസിസ്റ്റന്റ് ടീച്ചര് ഗ്രേഡ് രണ്ട്, ഹൈസ്കൂള് വിഭാഗത്തില് വരുന്ന ഇന്സ്ട്രക്ടര് -സ്പെഷലിസ്റ്റ് അധ്യാപകര് എന്നിവരുടെ ശമ്പള സ്കെയിലും 11620-20240 എന്നതില്നിന്ന് 13210-22360 ആയി വര്ധിപ്പിക്കും. കേരള സ്കൂള് ടീച്ചേഴ്സ് ഫ്രണ്ട് (കെഎസ്ടിഎഫ്) നല്കിയ നിവേദനത്തിന്റെ അടിസ്ഥാനത്തിലാണു തീരുമാനം എന്നു മന്ത്രിയുടെ ഉത്തരവില് പറഞ്ഞു. പത്രവാര്ത്തയുടെ അടിസ്ഥാനത്തില് തയ്യാറാക്കിയ ഒരു പോസ്റ്റാണിത്. ഇതേക്കുറിച്ചുള്ള കൂടുതല് വിവരങ്ങള് ഞങ്ങള്ക്കും ലഭ്യമല്ല. കൃത്യതയാര്ന്ന വിവരങ്ങള് ധനകാര്യവകുപ്പിന്റെ ഉത്തരവില് നിന്ന് ലഭിക്കുന്നതായിരിക്കും. ഈ പ്രശ്നം സര്ക്കാരിന്റെയും ധനകാര്യമന്ത്രിയുടേയും ശ്രദ്ധയില്പ്പെടുത്താന് കേരള സ്ക്കൂള് ടീച്ചേഴ്സ് ഫ്രണ്ട് ജില്ലാ പ്രസിഡന്റും പാലാ സെന്റ് തോമാസ് ഹയര്സെക്കന്ററി സ്ക്കൂളിലെ അധ്യാപകനുമായ ശ്രീ. ജോര്ജ്ജു കുട്ടി ജേക്കബ് ഉന്നയിച്ച പ്രശ്നങ്ങള് സംഘടനയുടെ ബ്ലോഗില് പറയുന്നതിങ്ങനെ.
- “ഹയര് സെക്കണ്ടറി അധ്യാപകരുടെ ശമ്പള പരിഷ്കരണത്തിലെ അപാകത പരിഹരിച്ചതായി 17/2/2013-ലെ മലയാള മനോരമ പത്രത്തില് റിപ്പോര്ട്ടുണ്ട്. ഇവരുടെ അപാകത പരിഹരിച്ചതില് കേരളത്തിലെ അധ്യാപക സമൂഹത്തിന് സന്തോഷമുണ്ട്. എന്നാല് ഇതേ പോലെ ശമ്പളപരിഷ്കരണത്തിലെ അപാകത പ്രൈമറി,ഹൈസ്ക്കൂള് അധ്യാപകര്ക്കുമുണ്ട്. അവരുടെ അപാകതകള് കൂടി എത്രയും വേഗം പരിഹരിക്കണം.”
- “കേരള സ്ക്കൂള് ടീച്ചേഴ്സ് ഫ്രണ്ട് ബഹുമാനപ്പെട്ട ധനകാര്യവകുപ്പു മന്ത്രി ശ്രീ കെ.എം. മാണി സാര് മുമ്പാകെ ഈ വിഷയം അവതരിപ്പിച്ചിട്ടുള്ളതും സംസ്ഥാനസമ്മേളനത്തില് പ്രഖ്യാപിച്ചിട്ടുള്ളതുമാണ്. സേവന വേതന വ്യവസ്ഥകളില് പിറകിലായിരുന്നവരെല്ലാം മുമ്പിലായപ്പോഴും പ്രതികരിക്കുവാന് കഴിയാതെ മറ്റാരെങ്കിലും പ്രതികരിക്കട്ടെ എന്നുകരുതി പ്രതികരിക്കാതെ, സംഘടിക്കാതെ വഴിമാറിപോകുന്ന അധ്യാപക സമൂഹം നേരിടുന്നത് അവഗണന മാത്രമല്ല അവഹേളനംകൂടിയാണ്. ഉദാഹരണമായി രണ്ട് ശമ്പള പരിഷ്കരണങ്ങള്ക്ക് മുമ്പ് ഹൈസ്ക്കൂള് അധ്യാപകരുടെ ഒപ്പം Basic ഉണ്ടായിരുന്ന ഒരു വിഭാഗമായിരുന്നു പോലീസ് വകുപ്പിലെ S.I. (ഇവരുടെ യോഗ്യത ഡിഗ്രി മാത്രമാണ്) 2009-ലെ ശമ്പള പരിഷ്കരണത്തില് S.I.-യുടെ Basic 16980 ആയപ്പോള് HSA -യുടേത് 14620 മാത്രം. Basic 2360 വ്യത്യാസം. നമുക്കും പ്രതികരിക്കേണ്ടേ...............?”
